Цагаан хэрэм дээр дроноор
Хятадын хүнсний хүргэлтийн аварга болох Мэйтуан компани Цагаан хэрмийг үзэхээр ирэх жуулчдад хоол хүнс болон эмнэлгийн хэрэгсэл зэрэг бараа бүтээгдэхүүнийг дроноор хүргэх үйлчилгээ нээсэн бөгөөд Цагаан хэрмийн хамгийн алслагдсан хэсэгт ч хүрэх боломжтой.
Одоогоор хүргэлт хийж буй дроны эхлэл цэг нь ойролцоох зочид буудлын дээвэр бол эцсийн цэг нь Бадалингийн өмнөд хэсэг бөгөөд Хятадын хойд нутгийг эмжин хэдэн мянган км үргэлжлэх их хэрмийн хамгийн алдартай хэсэг юм.
Энэхүү дрон үйлчилгээ нь 50 минут алхаж хүрэх замыг ердөө 5 минутын дотор туулж, нэн шаардлагатай зүйлсийг зочдод хүргэнэ. Дрон нь дунд зэргийн салхи, борооны нөхцөлд хэвийн нислэг үйлдэж, нэг удаадаа 2.3 кг ачаа тээвэрлэх чадвартай. Нэг удаад ачаа хүргэх зардал нь ердөө 4 юань буюу энгийн хүргэлттэй адил аж.
Дрон үйлчилгээний дээд даац нь 15 кг, хамгийн ихдээ 20 км зайд хүрэх чадвартай тул уулын эргэлдсэн замд дөрвөн цаг явах газрыг 20 минутад туулдаг байна. Мэйтуаны ажилчид өглөө 10 цагаас эхлэн 16 цаг хүртэл захиалга авч, барааг тээвэрлэлтэд бэлтгэн баглах, нисгэгчгүй онгоцыг хөөргөх болон хүлээн авах ажлыг бэлтгэнэ.
Цагаан хэрэмд дроноор ачаа хүргэх үйлчилгээ нь Бээжинд анхдагч бол Шэньжэнь, Шанхай хотуудад нисгэгчгүй дроноор бараа хүргэх үйлчилгээ хэдийн нэвтэрсэн.
CNN агентлагийн мэдээлснээр Хятад улс нисгэгчгүй онгоцны дэлхийн хамгийн том үйлдвэрлэгч, экспортлогч орон юм. Энэ салбар нь тээврийн хүртээмж муутай хот, хөдөө орон нутагт амьдардаг хүмүүст тав тухыг бий болгож байна.
(Эх сурвалж https://eagle.mn/, https://asianews.network/)
