Фужицү ба NVIDIA AI хагас дамжуулагчийг хамтран хөгжүүлнэ
Фужицү компани энэ сарын 3-ны өдөр АНУ-ын NVIDIA компанитай хамтран хиймэл оюун ухаанд (AI) зориулсан хагас дамжуулагч (чип)-ийг хамтран хөгжүүлэхээр болсон тухайгаа зарлалаа. Фужицүгийн хагас дамжуулагч нь Японы үндэсний хэмжээний суперкомпьютер болох "Fugaku"-д ашиглагдсаар ирсэн. Энэ удаа NVIDIA-ийн хагас дамжуулагчтай өндөр хурдтай холбож, үр ашигтай ажиллагааг нэмэгдүүлж, эрчим хүчний хэрэглээг багасгахыг зорьж байна. Энэ нь дата төв, робот зэрэг салбаруудад хэрэглээний эрэлт хэрэгцээг нэмэгдүүлэх боломжтой юм.NVIDIA нь хиймэл оюун ухааны тооцоололд тохирсон дүрс боловсруулагч хагас дамжуулагч (GPU)-ийн тэргүүлэгч компани юм. Харин Фужицү нь тооцооллын удирдлагыг гүйцэтгэдэг төв процессорын (CPU) хөгжүүлэлт дээр ажилладаг. Хоёр компани 2030 он гэхэд тус бүрийн хагас дамжуулагчийг нэгэн ижил суурь хавтан буюу (substrate)-д холбохоор төлөвлөж байна. GPU, CPU зэрэг олон төрлийн чипийг нэг чип мэт өндөр хурдтай холбох NVIDIA-ийн технологийг ашиглана.
Тухайн өдөр болсон хэвлэлийн бага хуралд оролцсон NVIDIA компанийн гүйцэтгэх захирал (CEO) Женсен Хуанг (Jensen Huang) нь Фужицүгийн CPU-тай холбогдсоноор "шинэ түвшний эрчим хүчний хэмнэлт ба өндөр үр ашиг"-ийг хэрэгжүүлэх боломжтой гэдгийг онцолсон байна.
Харин Фужицү компанийн ерөнхийлөгч Takuhito Tokita нь "Бид ижил зорилго, алсын хараатайгаар AI-гаар хөдөлгөгдөх нийгмийг бүтээх анхны алхмаа хийлээ" гэж мэдэгджээ. Хамтран хөгжүүлэх уг хагас дамжуулагчийг AI дата төвөөс гадна робот, автомашин зэргийн хэрэглээнд зориулан өргөнөөр нийлүүлэхээр төлөвлөж байна.
(Эх сурвалж https://www.nikkei.com)
