Японы хамгийн том сүлжээ дэлгүүр "Seven-Eleven" ажиллах хүчний хомсдолыг арилгах, дэлгүүрийн ажлыг оновчтой болгох зорилгоор роботуудыг туршилтын журмаар Токио дахь салбараас эхлээд байна.
Роботууд дэлгүүрийн ундаа, согтууруулах ундааны тавиуруудыг дүүргэх ажил хийж байна. Мөн хиймэл оюун ухааны тусламжтайгаар борлуулалтын мэдээлэлд үндэслэн ямар бүтээгдэхүүнийг нөөцлөх шаардлагатайг тогтоож байгаа бөгөөд энгийн хүн долоо хоногт 10 цаг зарцуулж хийдэг ажлыг хөнгөвчилж байгаа юм байна.
Шал, цонх цэвэрлэх ажлыг хийж буй роботууд ч байна. Түүнчлэн өөрөө тооцоо хийх хэсэгт виртуал кассчин гаргасан бөгөөд үйлчлүүлэгч виртуал ажилтантай ярилцсанаар алсаас тусламж авч, тооцоогоо өөрөө хийнэ.
Энэ мэтчилэн өдөр тутмын ажилд роботууд ашигласнаар нийт хийх ёстой ажлын 20-30 хувийг хөнгөвчилнө. Цаашид сүлжээ дэлгүүрийн бүх ажилд роботуудыг бүрэн нэвтрүүлэхээр зорьж байна.
(Эх сурвалж https://news.mn, https://diamond-rm.net)
